Xuntos na distancia IX: 5º aniversario
- litorequartet
- Mar 11
- 3 min de lectura
Aínda que a data oficial do noso quinto aniversario foi en outubro de 2024, non queriamos deixar pasar a oportunidade de celebralo cun evento á altura. E que hai máis especial que regresar á nosa cuna, ao lugar onde demos os nosos primeiros pasos e fortalecemos os nosos lazos persoais? Neste artigo do blog de Lítore contámosvos todos os detalles deste encontro tan especial en Palma, a nosa casa.
O martes 4 de marzo aterrábamos en Palma preparados para unha semana intensa chea de ensaios e reencontros. Os obxectivos eran dous: o concerto de celebración do noso quinto aniversario, o venres 7 de marzo na Igrexa de Sant Felip Neri, Palma; e dúas charlas como artistas convidados no Conservatorio Superior das Illes Balears sobre a música de cámara e as dinámicas de grupo.
O mércores 5 retomabamos os ensaios co obxectivo de preparar o programa do concerto, no que decidimos incluír obras significativas para nós durante estes anos e relacionalas coas nosas vivencias. Porén, dúas delas eran repertorio novo para nós: por unha banda, quixemos dedicar as Old Hungarian Dances de Ferenc Farkas á memoria do noso querido Henrie Adams, director convidado do ensemble de saxofóns do Mallorca Saxophone Studio. Henrie foi unha influencia musical e persoal moi importante para nós durante a nosa etapa de estudantes en Mallorca, e con esta suite quixemos lembrar o tempo compartido con el e o seu característico sentido do humor.
A segunda novidade do programa foi quizais a máis significativa para nós, xa que o noso admirado profesor e amigo Xabier Casal interpretou a parte solista dun arranxo para quinteto de saxofóns do Concerto para violín nº 1 en la menor de Johann Sebastian Bach.
Os días de ensaio pasaron voando entre reencontros, ensaimadas en Can Joan de S’Aigo e conversas cheas de nostalxia. O resto de obras que preparamos para o concerto foron clásicos do noso repertorio, como Der blutige Schaffner de Robin Hoffmann ou as Fantasy Etudes de William Albright, e unha obra que tiñamos moitas ganas de recuperar: Suix de Javier Girotto. O concerto foi moi especial, cun público moi próximo cheo de amigos, profesores e familiares. Grazas, Xabi, por tocar connosco e compartir de novo o escenario. Ojalá o poidamos facer moitas veces máis no futuro!
O sábado 8 de marzo realizamos dous obradoiros no Conservatorio Superior de Música das Illes Balears dirixidos a todo o alumnado e profesorado do centro. No primeiro deles, quixemos compartir a nosa experiencia na música de cámara e na xestión da agrupación.
Despois desta charla, colaboramos co fisioterapeuta e director de escena Carles Expósito para presentar un obradoiro no que explicamos o noso proxecto Máis Alá da Música. Nel, fixemos varios exercicios sobre conexión grupal cos alumnos do centro e reflexionamos sobre a importancia deste tipo de traballo para levar a música de cámara ao máis alto nivel. Grazas ao CSMIB por convidarnos e acoller o noso encontro!
Pola tarde do sábado gozamos da compañía dos amigos e da gastronomía local, que botamos tanto de menos. Queremos dar as grazas a Germán, Toni e Raquel por acollernos nas súas casas, e a Ángela e aos pais de Jaime por viaxar ata Palma para apoiarnos. Foi un encontro moi especial, sen dúbida. Agardamos volver moi pronto. Grazas, Mallorca!
